Afmælistónleikar Þrasta í Eldborgarsal Hörpu þann 19. febrúar heppnuðust mjög vel. Um 500 manns komu á svið á þessum tónleikum sem voru glæsilegir í alla staði. Húsið var troðfullt af gestum, um 1.500 manns og allir skemmtu sér vel. Í lok tónleikanna var mögnuð stund þar sem allir risu úr sætum, sex karlakórar, 100 börn úr Hafnarfirði og 1.500 tónleikagestir og sungu þjóðsönginn hástöfum. Þrestir stóðu í þar í miðju sönghafi og fengu margir „gæsahúð“.

Listamenn sem komu fram á söngveislunni í Eldborg, 19.febrúar 2012

• Þrestir 
• Jónas Þórir og dægursveitin hans
• Hjörleifur Valsson og sinfóníuhljómsveitin hans
• Bergþór Pálsson, Björgvin Halldórsson, Egill Ólafsson, Garðar Thór Cortes, Gissur Páll Gissurarson, Jóhann Sigurðarson, Óskar Pétursson, Sigrún Hjálmtýsdóttir (Diddú) og Örn Árnason
• Karlakór Hreppamanna, Karlakór Keflavíkur, Karlakór Reykjavíkur, Karlakór Selfoss, Karlakórinn Eldri Þrestir og Krakkarnir í Hafnarfirði 
• Jón Kristinn Cortez stjórnaði öllu saman 
  Þess má geta að Jón Kristinn útsetti einnig stóran hluta þeirra verka sem flutt voru á söngveislunni.

Framundan eru vortónleikar afmælisársins þar sem Íslands dáðustu náttúrubörn, þau Eivör, Mugison og KK, munu syngja með Þröstum og skemmta sjálfum sér og öðrum. Það verður bara fjör á 100 ára afmælisári Þrasta.

Kíkið á fésbókarsíðu Þrasta og spjallið við okkur 

http://www.facebook.com/threstir.is

Nú er hafinn undirbúningur glæsilegrar afmælisöngveislu 19. febrúar 2012, en þá verða ákkúrat liðin 100 ár frá því að Karlakórinn Þrestir var stofnaður 19. febrúar 1912, í gamla barnaskólahúsinu í Hafnarfirði.

Til að minnast þessara tímamóta og þar með 100 ára karlakórastarfs á Íslandi, verður m.a. haldin viðamikil söngveisla í Eldborg, aðalsal tónleikahússins Hörpu í Reykjavík, undir stjórn Jóns Kristins Cortez, stjórnanda Þrasta. Fyrri hluta tónleikanna syngja Þrestir og einsöngvarar með Jónasi Þóri á flyglinum með og án dægursveitar. Eftir hlé koma svo saman sinfóníusveit undir stjórn Hjörleifs Valssonar, Þrestir, einsöngvarar, auk söngbræðra úr völdum karlakórum og mynda yfir 300 manna tónsveit sem ætlar að gera skil stóru kórverkunum, með stóru KÁI!!

Það er reiknað með að mikill áhugi reynist vera á þessum viðburði og því bjóðum við áhugasömum upp á forskráningu á miðum á tónleikana, annað hvort með því að senda tölvupóst með nafni, heimilisfangi og fjölda miða á This e-mail address is being protected from spambots. You need JavaScript enabled to view it  eða að hringja í Sigurð Stefánsson í síma 896-0767 á milli 17 og 19 daglega með sömu upplýsingar.  Um leið og miðasala hefst verður síðan haft samband við þá sem skrá sig og njóta þannig forsölu að sínum miðum.  Verð miðanna er ekki alveg ljóst ennþá, en því verður haldið eins lágu og nokkur möguleiki er á; og forskráðir fá að vita verðið fyrstir allra.

Þessi söngveisla er þó alls ekki það eina sem gert verður til að minnast stofnunar Þrasta fyrir hundrað árum, því minningarsteinn um Friðrik Bjarnason. stofnanda Þrasta, verður afhjúpaður í Hafnarfirði á afmælisdaginn og Saga Þrasta, ásamt geisladiski með upptökum af söng kórsins í gegnum tíðina, kemur út á vordögum.

Það er alltaf pláss í kórnum fyrir nýja góða söngmenn, reynda sem óreynda.

Blessaðir hafið samband við okkur og setjum upp smáprufu, gersamlega hættulausa, með stjórnandanum okkar.

Kolviður  sími:  893-6109

Jakob      sími:  840-0551

Halldór    sími:  698-9802